Cinləri yarandığı surətdə görmək olarmı?

Aleykum salam. Peyğəmbərlər istisna olmaqla heç kim cinləri yarandıqları surətdə görə bilməz. Uca Allah buyurur: "Şübhəsiz ki, o və onun nəsli sizləri sizin onları görə bilmədiyiniz yerlərdən görürlər" (əl-Əraf, 27)
Amma Uca Allah cinlərə bizə insan, heyvan və s. surətində görünə bilmək bacarığı vermişdir. Bunun səhih hədislərdə müxtəlif dəlilləri var:

Rəvayət edilir ki, Əbu Hureyra (Allah ondan razı olsun) demişdir: “(Bir dəfə) Peyğəmbər (Allahın ona salavatı və salamı olsun) rama­zan ayında yığıl­mış zəkatı qoruyub saxlamağı mənə tapşırdı. Bu əsnada bir nəfər yanı­ma gəldi və ər­zaq­dan ovuclayıb (qabına) yığmağa başladı. Mən onu yaxalayıb dedim: “Vallahi, mən səni mütləq Peyğəmbərin yanına apa­ra­ca­ğam.” O yalvarıb: “Mən buna möhtacam, mənim külfətim var, özümün də (bu yeməyə) olduqca ehtiyacım var”– dedi, mən də onu buraxdım. Ertəsi gün Peyğəmbər məndən soruşdu: “Ey Əbu Hureyra! Tutduğun əsir nə etdi?” Mən dedim: “Ya Rəsulallah! O (mənə) həm ehtiyaclı, həm də külfət sa­hibi olduğundan gileyləndi. Buna görə də mənim ona yazığım gəldi və onu buraxdım.” Peyğəmbər dedi: “O sənə yalan danışıb və o yenə qayıda­caq.” Mən bilirdim ki, o qayıdacaq, çünki Peyğəmbər: “...o yenə qa­yı­da­caq”– deyə xəbər vermişdi. Odur ki, pusquda durub onu gözlədim. O, yenə gəlib ərzaqdan ovuclayaraq (qabına) yığmağa baş­ladı. Mən onu yaxalayıb dedim: “Səni hökmən Pey­ğəmbərin yanına aparacağam.” O yalvarıb dedi: “Burax məni! Doğrudan da, mən buna möhtacam və mənim külfətim var. (Söz verirəm ki,) bir daha (bura) qayıtmayaca­ğam.” Mənim ona yazığım gəl­di və mən yenə onu burax­dım. Ertəsi gün Peyğəmbər  mən­dən soruşdu: “Ey Əbu Hureyra! Dünən tutduğun əsir nə etdi?” Mən dedim: “Ya Rə­su­lal­lah! O, (mənə) həm möhtac, həm də külfət sahibi olduğundan giley-güzar elə­di. Buna görə də mənim ona yazığım gəldi və mən onu burax­dım.” Pey­ğəm­­bər dedi: “O sənə yalan danışıb və o yenə qayıdacaq.” Mən üçüncü dəfə pusquda dayanıb onu gözlə­dim. O, yenə gəlib ərzaqdan ovuclayaraq (qa­bına) yığ­mağa başladı. Mən onu yaxalayıb dedim: “Mən səni hökmən Pey­ğəm­bərin yanına aparacağam. Artıq üçüncü dəfədir ki, sən qayıt­ma­ya­ca­ğına söz verir, sonra da qayıdırsan.” O yalvarıb dedi: “Məni bu­raxsan, sə­nə elə sözlər öyrədərəm ki, Allah onların vasitəsilə sənə fayda verər.” Mən: “O nə sözdür?”– deyə soruş­dum. O dedi: “Yatağına uzananda Kürsü – “Allah, Ondan başqa ilah yoxdur, əbə­di Yaşayandır, bütün yaratdıqlarının Qəyyu­mu­dur..." (“əl-Bəqərə” surəsi, 255) – ayəsini axıra qədər oxu. Əgər bunu etsən, səhər yuxudan oyana­nadək sənin ya­nında Allahın təyin etdiyi gözətçi (bir mələk) durar və şeytan sənə yaxınlaşmaz.” Mən yenə onu buraxdım. Səhəri gün Peyğəmbər mən­dən soruşdu: “Dünən tutduğun əsir nə etdi?” Mən dedim: “Ya Rəsulallah! O, Allahın izni ilə mənə faydası olacaq sözlər öyrədə­cəyini söylədi və mən də onu buraxdım.” Peyğəmbər: “Nədir o?”– deyə soruşdu. Mən dedim: “O mənə söylədi ki, yatağına uzananda Kürsü – “Allah, Ondan başqa ilah yox­dur, əbə­di Yaşayandır, bütün yaratdıqla­rının Qəyyumu­dur...” – ayəsini əv­vəldən axıra qədər oxu. Əgər bunu etsən, səhər yuxudan oyana­nadək sənin yanında Allahın təyin etdiyi gözətçi (bir mələk) durar və şeytan sənə ya­xın­laş­maz.”

Səhabələr xeyirli işlərə ən çox can atan insanlar idi.

Peyğəmbər dedi: “O sənə doğru söylədi, halbuki özü qatı yalan­çıdır. Sən üç gecədir kiminlə söhbət etdiyini bilirsənmi, ey Əbu Hureyra?” Mən: “Xeyr!”– deyə cavab verdikdə, Pey­ğəmbər dedi: “Bu, şeytan idi!” (əl-Bu­xa­ri, 2311)

Həmçinin şeytan Bədr döyüşündən qabaq Qureyşli müşriklərə Suraqa ibn Malikin şəklində görünmüşdü. Uca Allah buyurur: "O zaman şeytan onların əməllərini özlərinə gözəl göstərib: "Bu gün insanlardan heç kəs sizə qalib gələ bilməz. Axı mən sizə yardım edən bir qonşuyam!"– demişdi, iki dəstə bir-birini gördükdə isə geri çəkilib: "Mən sizdən uzağam. Mən sizin görmədiklərinizi görürəm. Mən Allahdan qorxuram. Çünki Allah şiddətli cəza verəndir!"– demişdi" (əl-Ənfal, 48)