Allahın ad və sifətləri arasında nə fərq vardır?

Aleykum salam. Uca Allahın ad və sifətlərinə and içmək və sığınmaq olar. Bu baxımından onlar müştərək sayılırlar. Lakin, bunlar arasında fərqlər var və ən önəmli fərqlər aşağıdakılardır. Birinci: Uca Allahın adları ilə dua etmək və bu adların əvvəlinə "Abd" sözünü əlavə edib, insana ad qoymaq icazəlidir. Amma sifətlər ilə bunu etmək olmaz. Məsələn, "əl-Kərim" adından "Əbdul-Kərim" adı qoymaq olar, amma "əl-Kərəm" sifətindən "Əbdul-Kərəm" adı düzəltmək olmaz. Həmçinin "əl-Kərim" adını "Ey Kərim olan Allah" deyərək, dua etmək olar. Amma "əl-Kərəm" sifətini "Ey Allahın kərəmi" deyib, dua etmək olmaz. İkinci: Uca Allahın adlarından sifət düzəltmək olar. Məsələn: "ər-Rahmən" adından rəhmət sifəti düzəltmək olar. Lakin, Allah Təalanın sifətlərindən şəriətin demədiyi adları düzəltmək olmaz. Məsələn, istiva (ucalmaq) sifətindən "əl-Mustəvi" (ucaldan) adı düzəltmək olmaz. Üçüncü: Uca Allahın fellərindən şəriətin demədiyi adları düzəltmək olmaz. Uca Allahın fellərindən biri qəzəblənmək felidir. Amma bu feldən "əl-Ğadib", yəni qəzəblənən adı düzəltmək olmaz. Allah Təalanın sifətlərini isə, fellərindən düzəltmək olar. Qəzəblənmək sifətini Uca Allaha nisbət edirik. Çünki qəzəblənmək Onun fellərindən biridir.