Allaha belə dua etmək olarmı: "Allahım! Bu günahı bir də etsəm məni cəzalandır"?

Və aleykum Salam. Bu şəkildə dua etmək qadağan olunub və bu düzgün deyil. Uca Allah mərhəmətlidir, rəhmlidir və rəhməti çox genişdir. İnsan etdiyi günahdan tövbə etməli, Allahdan bağışlanma və salamatlıq istəməlidir. Əgər insan Uca Allahdan günahlara görə dünyada cəzalanmağı istəsə, buna dözə bilməz, məhv olar. Uca Allah bu xüsusda buyurur: "Əgər Allah insanları qazandıqları günahlara görə (dərhal) cəzalandırsaydı, yer üzündə bir canlını belə (sağ) buraxmazdı. Lakin Allah onlara müəyyən vaxtadək (Qiyamət gününə qədər) möhlət verir. Onların vaxtı gəlib çatdıqda isə (hər kəsə öz əməlinə görə cəza, yaxud mükafat verəcək). Şübhəsiz ki, Allah Öz qullarını görəndir" (Fatir, 45).

Ənəs (Allah ondan razı olsun) rəvayət edir ki, bir dəfə Peyğəmbər (ona və ailəsinə Allahın salavatı və salamı olsun) çox zəifləyib quş balası kimi olmuş bir xəstəni ziyarət etdi və soruşdu: "Allahdan hər hansı bir şey istəmişdinmi?" O dedi: "Bəli, belə dua edirdim: "Ey Allahım, Axirətdə mənə verəcəyin cəzanı dünyada qabaqcadan ver". Peyğəmbər (ona və ailəsinə Allahın salavatı və salamı olsun) buyurdu: "Buna dözə bilməzsən. Əksinə belə desəydin olmazdımı: Ey Allahım, bizə dünyada da yaxşılıq ver, axirətdə də yaxşılıq ver və bizi Cəhənnəm əzabından qoru?" Sonra o dua etdi və Allah ona şəfa verdi". (Muslim, 2688). Həmçinin oxuyun: