Orucun qəzası və televizora baxmaq haqda

Və aleykum Salam.
1) Oruc tutmadığınız günlərin qəzalarını tutmaq iqtidarında olan adam kəffarə verə bilməz. Ona görə də sizə qəza oruclarını tutmaq kifayət edir. Kəffarə verməyinizə isə ehtiyac qalmır. Kəffarə yalnız o insanın boynuna düşür ki, o insan xəstəliyinə görə heç vaxt oruc tuta bilməyəcəyinə əmindir. Uca Allah buyurur: "Sizdən xəstə və ya səfərdə olanlar tutmadığı günlər qədər başqa günlərdə oruc tutmalıdırlar. Oruc tutmağa taqəti olmayanlar isə (hər günün əvəzində) bir yoxsulu doyduracaq qədər fidyə verməlidirlər" (əl-Bəqərə, 184)
2) Qeyd etdiyiniz hədis haqda heç bir məlumatımız yoxdur. Televizor, radio, internet və s. xeyirli məqsədlər üçün (məsələn elmi artırmaq, xeyirli işləri təbliğ etmək, insanları vacib şeylər haqda xəbərdar etmək və s.) istifadə edildikdə halal, günah işlər üçün istifadə edildikdə (məsələn, harama baxmaq, dinləmək, naməhrəmlə ünsiyyət və s.) isə haramdır.
Televizora çox baxmaq, aludə olmaq isə insana verilmiş ən dəyərli nemətlərdən biri olan vaxtını səmərəli işlərə sərf etməkdən yayındırır. Həmçinin televizorda yarıçılpaq qadınlara, əxlaqsız filmlərə, falçı və ekstrasenslərin təbliğ olunmasına, dedi-qodu verilişlərinə və s. haram şeylərə baxmaq olmaz.
Uca Allah buyurur: "Mömin kişilərə de ki, (harama baxmayıb) gözlərini aşağı diksinlər və cinsiyyət üzvlərini (zinadan) qorusunlar. Bu, onlar üçün daha təmiz olar. Şübhəsiz ki, Allah onların nə etdiklərindən xəbərdardır. Mömin qadınlara da de ki, (harama baxmayıb) gözlərini aşağı diksinlər və cinsiyyət üzvlərini (zinadan) qorusunlar". (ən-Nur, 30-31).
Peyğəmbər (ona Allahın salavatı və salamı olsun) demişdir: “...Gözün zinası baxmaqdır...”. (əl-Buxari, 6243).