"Allahın hökmü ilə hökm etməyənlər..." - əl-Maidə surəsi 41 - 47 - ci ayələr
“Ey Elçi! Qəlbləri iman gətirmədiyi halda ağızları ilə: “İman gətirdik!”– deyən kimsələrdən küfrə can atanlar qoy səni kədərləndirməsin. Həm yəhudilərdən yalana həvəslə qulaq asanlar, həm də sənin yanına gəlməyən başqa bir camaata həvəslə qulaq asanlar vardır. Onlar haqqı dərk etdikdən sonra kəlmələrin yerlərini dəyişdirib deyirlər: “Əgər sizə bu dəyişdirilən hökm verilsə, onu götürün. Yox əgər o verilməsə, çəkinin!” Allah kimi fitnəyə salmaq istərsə, sən ondan ötrü heç bir şeylə Allaha mane ola bilməzsən. Onlar o kəslərdir ki, Allah onların qəlbini təmizləmək istəməmişdir. Onlar dünyada rüsvay, axirətdə isə böyük bir əzaba düçar olacaqlar. Onlar yalana həvəslə qulaq asanlar və daima haram yeyənlərdir. Əgər onlar sənin yanına gəlsələr, aralarında hökm ver və ya onlardan üz çevir. Əgər onlardan üz çevirsən, sənə heç bir şeylə zərər verə bilməzlər. Əgər onların arasında hökm verməli olsan, ədalətlə hökm ver. Şübhəsiz ki, Allah ədalətli olanları sevir. İçində Allahın hökmü olan Tövrat özlərində olduğu halda onlar səni necə hakim təyin edirlər? Hələ bir bundan sonra da verdiyin hökmdən üz çevirirlər. Onlar mömin deyillər. Şübhəsiz ki, Tövratı Biz nazil etmişik. Onda hidayət və nur vardır. Allaha təslim olan peyğəmbərlər yəhudilər üçün bununla, din xadimləri və baş keşişlər isə Allahın Kitabından qorunub saxlanılanlarla hökm verirdilər. Onlar hamısı buna şahid oldular. İnsanlardan qorxmayın, Məndən qorxun! Ayələrimi ucuz qiymətə satmayın. Allahın nazil etdiyi ilə hökm verməyənlər – məhz onlar kafirlərdir. Biz Tövratda onlara yazıb buyurduq ki, cana can, gözə göz, buruna burun, qulağa qulaq, dişə diş, vurulmuş yaralara da yaralar qisas alınmalıdır. Hər kəs bunu sədəqə etsə (qisasdan vaz keçsə), bu onun üçün kəffarə olar. Allahın nazil etdiyi ilə hökm verməyənlər – məhz onlar zalımlardır. Onların ardınca Məryəm oğlu İsanı özündən əvvəlki Tövratı təsdiqləyici olaraq göndərdik. Ona içərisində hidayət və nur olan, özündən əvvəlki Tövratı təsdiqləyən, müttəqilər üçün doğru yol göstəricisi və öyüd-nəsihət olan İncili verdik. Qoy İncil əhli Allahın onda nazil etdiyi şəriət qanunları əsasında hökm versinlər. Allahın nazil etdiyi ilə hökm verməyənlər – məhz onlar fasiqlərdir”
Rəvayət edilir ki, Bəra ibn Azib (Allah ondan razı olsun) demişdir: “Yəhudilər üzünü his-pasla qaraltdıqları və şallaqladıqları bir yəhudi ilə Peyğəmbərin - salləllahu aleyhi və səlləm - yanından keçib getdikləri zaman Peyğəmbər - salləllahu aleyhi və səlləm - onları çağırıb dedi: “Sizin kitabınızda zinakarı bu cür cəzalandırmaq əmr olunub?” Onlar: “Bəli”- deyə cavab verdilər. Peyğəmbər - salləllahu aleyhi və səlləm - onların alimlərindən birini çağırıb dedi: “Səni Musaya Tövratı nazil edən Allaha and verirəm! De görüm sizə kitabınızda zinakarı belə cəzalandırmaq əmr olunub?” O dedi: “Xeyr! Əgər sən, Allaha and verməsəydin, mən sənə bu barədə xəbər verməzdim. Həqiqətən, zinakarın daş-qalaq olunması bizə əmr edilib, lakin zina edənlərin çoxu bizim şərəflilərimizdən olduğu üçün biz onları cəzasız buraxır və yalnız zəifləri cəzalandırırdıq. Sonra qərara gəldik ki, elə bir hökm çıxaraq ki, hamıya şamil edilsin. Elə buna görə də daş-qalağın hökmünü üzün his-pasla qaraldılması və şallaqlanma ilə əvəz etdik”. Peyğəmbər - salləllahu aleyhi və səlləm – (dua edərək) dedi: “Allahım! Həqiqətən, mən sənin ləğv edilmiş əmrini qüvvəyə mindirən ilk şəxsəm”. Sonra o, yəhudini daş-qalaq etməyi əmr etdi və onlar da onun əmrini yerinə yetirdilər. Uca Allah da bu ayəni nazil etdi: “Ey Elçi! Qəlbləri iman gətirmədiyi halda ağızları ilə: “İman gətirdik!”– deyən kimsələrdən küfrə can atanlar qoy səni kədərləndirməsin. Həm yəhudilərdən yalana həvəslə qulaq asanlar, həm də sənin yanına gəlməyən başqa bir camaata həvəslə qulaq asanlar vardır. Onlar haqqı dərk etdikdən sonra kəlmələrin yerlərini dəyişdirib deyirlər: “Əgər sizə bu dəyişdirilən hökm verilsə, onu götürün…” (əl-Maidə, 41). O (yəhudilərin alimi) dedi: “Muhəmmədin - salləllahu aleyhi və səlləm - yanına gedin! Əgər sizə zinakarı his-pasa bulayıb şallaqlamağı əmr edərsə, onun dediyini qəbul edin, yox, əgər daş-qalaq etməyə fətva verərsə, bundan çəkinin!” Uca Allah da kafirlər barəsində bu ayələri nazil etdi:
“Allahın nazil etdiyi ilə hökm verməyənlər – məhz onlar kafirlərdir” (əl-Maidə, 44);
“Allahın nazil etdiyi ilə hökm verməyənlər – məhz onlar zalımlardır” (əl-Maidə, 45);
“Allahın nazil etdiyi ilə hökm verməyənlər – məhz onlar fasiqlərdir” (əl-Maidə, 47)”.
Muslim, 3212, 4536; əl-Qurtubi “Təfsir” 6/177.
Rəvayət edilir ki, İbn Abbas (Allah ondan razı olsun) demişdir: “Cahiliyyə dövründə yəhudilərdən olan Bənu Nədir qəbiləsinin sakinləri Bənu Qureyzə qəbiləsinin sakinlərindən daha şərəfli sayılırdılar. O zaman Bənu Qureyzə qəbiləsindən olan bir şəxs Bənu Nədir qəbiləsindən olan hər hansı bir şəxsi öldürsəydi, bunun müqabilində onu öldürərdilər. Əks halda isə Bənu Nədir qəbiləsi onlara qanbahası olaraq yüz “vəsəq” (bir dəvə yükü ağırlığında) xurma verərdi. İslam dini gəldikdən sonra Bənu Nədirdən olan bir şəxs Bənu Qureyzədən olan bir şəxsi öldürdü və onlar da: “Onu bizə təslim edin oldürək!” deyə qatili tələb etdilər. Bənu Nədirdən olanlar dedilər: “Bizimlə sizin aranızda hakim Muhəmməd – salləllahu aleyhi və səlləm – olacaq”. Onlar Peyğəmbərin – salləllahu aleyhi və səlləm – yanına gəldikləri zaman bu ayə nazil oldu: “Əgər onların arasında hökm verməli olsan, ədalətlə hökm ver” (əl-Maidə, 42). Ədalət o deməkdir ki, canın qisası can olsun! Sonra Uca Allah bu ayəni nazil etdi: “Onlar cahiliyyə dövrünün hökmünümü istəyirlər?” (əl-Maidə, 59)”.
Əbu Davud, 4496; ən-Nəsai, 4732; İbn Hibban, 5057; əd-Dəraqutni, 3447; əl-Hakim, 8094. əl-Albani səhih olduğunu bildirmişdir.