Olduğu yerə uğursuzluq gətirən insan ola bilərmi?

Və aleykum Salam. Dinimizdə "uğursuz insan" deyə bir anlayış yoxdur. Bu fikir, şeytanın sizə verdiyi vəsvəsədir. Bununla şeytan sizi məyus etmək və ümidsizliyə qapanmağınızı istəyir. Əksinə insanın uğursuzluğa inanması dinimizdə qadağandır. Uca Allah Quranda bir qəsəbəyə göndərdiyi elçilərdən və bu qəsəbənin əhalisinin onlarda uğursuzluq gördüklərindən xəbər verərək buyurur: "Onlar dedilər: “Biz siz­də bəd əla­mət (uğursuzluq) gördük. Əgər dəvə­ti­ni­zə son qoy­masanız, sizi müt­ləq daşqalaq edəcəyik və biz­dən sizə müt­ləq ağrılı-acılı bir əzab toxunacaqdır”. Elçilər dedilər: “Sizin uğur­suzlu­ğunuz öz ucbatı­nız­dandır (əməllərinizə görədir). Yoxsa sizə edilən öyüd-nəsihəti bəd əlamət sayır­sı­nız?! Doğrusu, siz həd­di aşmış bir qövmsünüz”. (Yasin, 18-19). ət-Tabəri bu ayəni təfsir edərək demişdir: "Yəni, başınıza gələn müsibətlər, bəlalar bizə görə deyil, bu, Uca Allahın sizə əzəldən yazdığı qəzavü-qədərdir".

Peyğəmbər (ona və ailəsinə Allahın salavatı və salamı olsun) belə buyurmuşdur: "Kim (düşər-düşməzlik, nəhs gətirmək, uğursuzluq və s. mövhumatı) sınaq etsə, yaxud etdirsə, kim baxıcılıq etsə, yaxud öz falına baxdırsa, kim sehr etsə, yaxud sehrbaza müraciət etsə bizdən deyildir. Kim də kahinin yanına gedib onun dediklərini təsdiqləsə, Məhəmmdə nazil olanı inkar etmiş olur". (əl-Munziri: "Tərğib va-t-Tərhib", 4/52; əl-Heysəmi, 5/117). 

Əbu Hureyra (Allah ondan razı olsun) rəvayət edir ki, Peyğəmbər (ona və ailəsinə Allahın salavatı və salamı olsun) demişdir: “Nə yoluxucu xəs­təlik (yəni xəstəlik bir adamdan başqa birisinə öz təsiri ilə yox, yalnız və yalnız Allahın izni ilə keçə bilər), nə bəd əlamət (insanların bəd əlamət və uğursuzluq hesab etdiyi bir hadisə nəticəsində Allahın əzəldən yazdığı qəzavü-qədərin dəyişəcəyini etiqad etmək qadağandır. Bütün bunlar cahiliyyə dövründən qalma batil fər­ziy­yələrdir), nə bayquş (bayquş görməyi bəd əlamət hesab etmək, onun qonduğu yerə və o ərazidə olanların başı­na müsibət gələcəyini iddia etmək qadağandır) və nə səfər (ayı) deyilən bir şey yoxdur” (əl-Buxari, 5271, 5707). Həmçinin oxuyun: