İctimai yerlərdə şirk əməl gördükdə nə etmək lazımdır?

    14.04.2026
Sual: 
Salam aleykum Hal hazırda ağaclar gül açır. İnsanlar gül açan ağaclara qırmızı iplər bağlayırlar. Parkda ağaca yaxınlaşanda gördüm ki, üzərində çoxlu qırmızı iplər var. Bildim ki, şirk əməlidir. İpləri qopartdım və kəsdim. Sonra bir kişi yaxınlaşıb mənə dedi ki, sən düz iş görmürsən. Hərənin bir arzusu var. Bizim kənddə bir qadın var idi, uşağı olmurdu. Ağacdan istədi və sonra uşağı oldu. Mən də dedim ki, insanlar şirk edirlər. Onların arzusunu Allah yetirər. Etdiyim əməl doğrudur mu? Yoxsa ağacda və ya digər yerlərdə insanların arzularının gerçəkləşməsi məqsədilə asdıqları ip, lent kimi şeylərə toxunmamaq lazımdır? İctimai yerlərdə şirk olunan əməl gördükdə nə etmək lazımdır?
Cavab: 

Və aleykum Salam. Ağaclara və ya başqa şeylərə arzu üçün ip bağlamaq İslam dininə zidd olan batil bir əməldir. Bu əməlin hökmü insanın niyyətindən asılı bidət, kiçik şirk, hətta böyük şirk ola bilər. Əgər insan arzuları və istəkləri Uca Allahın yerinə yetirdiyini, lakin bu ağaclara ip bağlamağın arzunun geçəkləşçməsinə bir səbəb olduğuna etiqad edərsə, bu, bidət və şirkə aparan bir əməl olar. Çünki dinimiz bizə duaların qəbul olunmasının, arzu və istəklərin həyata keçməsinin bütün səbəblərini bildirmişdir. Bu səbəblər arasında yeni çiçək açmış ağaclara və ya digər əşyalara ip bağlamaq yoxdur. Bu barədə ətraflı oxuyun:


Yaxşılığı əmr edib pislikdən çəkindirmək hikmət, səbir və elm tələb edir. Dinimizə zidd olan batil bir əməlin şahidi olan şəxs bu əməli bacardığı qədər qadağan etməli və aradan qaldırmağa çalışmalıdır. Belə hallarda nəticəni və ətrafı da nəzərə almaq vacibdir. Odur ki bu işi edərkən hikmətli olmalı, insanlarla sərt şəkildə deyil, yumşaq və mülayim rəftar etməlidir. Çünki məqsəd yalnız ipi kəsmək deyil, insanların qəlbindəki batil inancı da dəyişməkdir. Əgər bu cür müdaxilə mübahisə, dava və ya daha böyük fitnəyə səbəb olacaqsa, o zaman açıq şəkildə dəyişməkdən çəkinmək tövsiyə olunur. Bu halda insan əvvəlcə dili ilə nəsihət etməlidir, əgər bu mümkün deyilsə, qəlbi ilə bu əməli pis görməsi kifayətdir. Uca Allah buyurur: "(İnsanları) Rəbbinin yoluna hikmətlə, gözəl öyüd-nəsihətlə dəvət et və onlarla ən gözəl tərzdə mübahisə et. Şübhəsiz ki, Rəbbin azğınlığa düşənləri də, doğru yolda olanları da yaxşı tanıyır". (ən-Nəhl, 125).

Peyğəmbərimiz (salləllahu aleyhi və səlləm) buyurmuşdur: "Sizdən bir kimsə münkər (pis, günah) iş görərsə, bacarırsa onu əli ilə dəf etsin, onu bacarmazsa dili ilə, onu da bacarmazsa qəlbi ilə dəf etsin ki, bu da imanın ən əşağı – və ya ən zəif – dərəcəsidir". (Muslim, 49). İslam alimləri demişlər ki, qəlb ilə dəf etmək həmin günah olan yeri tərk etməkdir. Həmçinin oxuyun:

Paylaş: