Sular

Göydən yağan və ya yerdən çıxan hər bir su təmizləyicidir.
Bunun təsdiqi olaraq Allah təala buyurur: "Biz göydən tərtəmiz su endirdik..."[1]
Peyğəmbər (S.A.V.) dəniz suyu haqqında belə demişdir: "Onun (dənizin) suyu təmizləyici, ölüsü isə halaldır"[2]
Həmçinin Peyğəmbər (S.A.V.) quyu suyu haqqında demişdir: "Su təmizləyicidir və onu heç nə murdar etmir"[3]
Demək su, təmiz maddələrin qarışması ilə, öz adını itirmədikcə, pak olaraq qalır. Buna dəlil Peyğəmbərin (S.A.V.) qızının cəsədini dəfnə hazırlayan qadınlara dediyi sözlərdir: "Onu, su və sidr ilə, üç, beş və ya gərəkli olsa daha çox yuyun. Sonda isə kafurdan və ya biraz kafurdan istifadə edin"[4].
Suya nəcasət düşərsə, həmin suya, öz keyfiyyətini itirmədikcə, murdar demək olmaz. Bunun dəlili Əbu Səidin rəvayət etdiyi hədisdir. Hədisdə deyilir ki, Peyğəmbərə (S.A.V.) belə bir sual verirlər: Budaə quyusundan dəstəmaz alaqmı? Belə ki, həmin quyuya aybaşı qanına bulanmış əskilər, it ətləri və heyvan leşləri atılır! Peyğəmbər (S.A.V.) dedi: "Su təmizləyicidir və onu heç nə murdar etmir"[5]