Bayram günü edilən müstəhəb əməllər

1. Qüsl etmək: Əlidən (A.R.O.) qüsl etmək haqqında soruşurlar və o, belə cavab verir: «Qüsl, cümə, ərəfa, fitrə və qurban günləri edilir»[1].
2. Ən gözəl paltar geyinmək: İbn Abbas deyir ki, «Peyğəmbər (S.A.V.) bayram günü qırmızı əbasını geyinərdi»[2].
3. Fitrə bayramı günü namaza getmədən öncə yemək yemək: Ənəs deyir ki, «Peyğəmbər (S.A.V.) fitrə bayramı günü bir neçə ədəd xurma yeməmiş evindən çıxmazdı»[3].
4. Qurban bayramı günü, öz qurbanından yemək üçün, səhər yeməyini gecikdirmək: Əbu Bureydə deyir ki, «Peyğəmbər (S.A.V.) fitrə bayramı günü yemək yeməmiş evindən çıxmazdı. Qurban bayramı günü isə, qurban kəsməmiş yemək yeməzdi»[4].
5. Getdiyi yolu dəyişib başqa yolla qayıtmaq: Cabir deyir ki, «Peyğəmbər (S.A.V.) bayram günləri getdiyi yolu dəyişib başqası ilə qayıdardı»[5].
6. Hər iki bayram günü təkbir etmək:

Uca Allah buyurur: «... fövtə gedən günlərin orucunu tamamlayasınız və sizi düz yola yönəltməsinə görə Ona (“Allahu əkbər” deməklə) təzim və şükür edəsiniz»[6]. Bu, fitrə bayramına aiddir.
Qurban bayramı haqqında isə, Uca Allah belə buyurur: «Sayı bəlli olan günlərdə Allahı yada salın (təkbirlə zikr edin)»[7]. Həmçinin buyurmuşdur: «...Allah sizi doğru yola yönəltdiyi üçün Onu (layiqincə) uca tutasınız deyə, bunları sizə belə ram etdi»[8].