Həddindən artıq qənaətcil və xəsis olduğuma görə günah qazanıram?
Aleykum salam. Uca Allah buyurur: "Onlar (mallarını) xərclədikdə nə israfçılıq, nə də xəsislik edər, bu ikisinin arasında orta bir yol tutarlar". (əl Furqan, 67).
İslam dini hər bir əməldə ölçülü olmağı və orta yol tutmağı buyurur. Ona görə də nə xəsis, nə də israfçı olmaq lazım deyildir. İnsan özünə baxmalıdır, əgər onda xəsislik üstünlük təşkil edirsə, o, özündə əliaçıqlıq amillərini inkişaf etdirməlidir. Həmçinin, əgər o, malı çox israf edən, bədxərclik edən insandırsa, özündə qənaət etmə amillərini inkişaf etdirməlidir. Beləliklə, insan səxavətli, əliaçıq və qənaətcil olmalı, xəsis və israfçı olmamağa çalışmalıdır. Xəsisliyin əlacı haqqında isə Peyğəmbər (sallallahu aleyhi və səlləm) demişdir: "Kim malı xərcləməyə xəsislik edər və gecə ibadətə qalxmağa çətinlik çəkərsə: “Subhənəllahi və bihəmdihi”- desin”.
Allah Elçisi (salləllahu aleyhi və səlləm) demişdir: “Kim gecə qalxmağa çətinlik çəkər, malı xərcləməyə xəsislik edər və ya düşmənlə vuruşmaqdan qorxarsa, “Subhənəllahi və bihəmdihi”- deməyi çoxaltsın. Şübhəsiz ki, bu kəlmə Allah Təalaya Onun yolunda dağ boyda qızılı xərcləməkdən daha sevimlidir”.
Həmçinin, əliaçıqlığı yaradan amillərdən axirəti, dünyanın sonunu tez-tez yada salmaq, dünya malının fani olması, savab qazanmağın isə öləndən sonra insana nə qədər faydalı olacağı barəsində düşünməkdir.