Əməlisehlərlə dostluq etməyin və elm məclisinin fəziləti
Əbu Hureyra (Allah ondan razı olsun) rəvayət edir ki, Allah Elçisi - salləllahu aleyhi və səlləm - demişdir: “Allahın yollarda dolaşıb Allahı yad edən insanları axtaran mələkləri vardır. Onlar Allahı yad edən bir camaat gördükləri zaman bir-birlərini çağırıb: “Axtardığınızın yanına gəlin!”- deyirlər. Sonra onlar bu camaatı öz qanadları ilə dünya səmasınadək əhatəyə alırlar. Elə həmin vaxt Rəbbi mələklərdən - (hər şeyi) onlardan daha yaxşı bildiyi halda - soruşur: “Qullarım nə deyirlər?” Mələklər: “Onlar Sənin şəninə təriflər deyir, Səni uca tutur, Səni həmd-səna ilə təqdis edir və Səni tərifləyirlər”- deyə cavab verirlər. Allah soruşur: “Məgər onlar Məni görüblərmi?” Mələklər deyirlər: “Xeyr, vallahi ki, onlar Səni görməyiblər!” Allah soruşur: “Bəs Məni görsəydilər, necə (olardı)?” Mələklər deyirlər: “Əgər onlar Səni görsəydilər, bundan da çox Sənə ibadət edər, Səni tərifləyər, Səni həmd-səna ilə təqdis edər və Sənin şənini uca tutardılar”. Allah soruşur: “Onlar Məndən nə istəyirlər?” Mələklər deyirlər: “Onlar Səndən Cənnəti istəyirlər”. Allah soruşur: “Məgər onlar Cənnəti görüblərmi?” Mələklər deyirlər: “Xeyr, ya Rəbb! Vallahi ki, onlar Cənnəti görməyiblər”. Allah soruşur: “Bəs onu görsəydilər, necə (olardı)?” Mələklər deyirlər: “Əgər onu görsəydilər, daha əzmlə ona can atar, daha inadla onu diləyər və daha çox rəğbətlə onu arzulayardılar”. Allah soruşur: “Onlar (Mənə) nədən sığınırlar?” Mələklər deyirlər: “Cəhənnəm odundan”. Allah soruşur: “Məgər onlar Cəhənnəmi görüblərmi?” Mələklər deyirlər: “Xeyr, ya Rəbb! Vallahi ki, onlar Cəhənnəmi görməyiblər”. Allah soruşur: “Bəs onu görsəydilər necə (olardı)?” Mələklər deyirlər: “Əgər onu görsəydilər, ondan daha uzağa qaçmağa çalışar və ondan daha çox çəkinərdilər!” Allah buyurur: “Şahid olun ki, Mən onları bağışladım!” Bu vaxt mələklərdən biri deyir: “Bu camaatın arasında olan filankəs onlarla (yoldaşlıq edən kimsələrdən) deyildir, sadəcə olaraq öz ehtiyacı üzündən ora gəlmişdir”. Onda Allah buyurur: “Bunlar elə insanlardır ki, onlarla oturub-duran adam bədbəxt olmaz”.[1]
Rəvayət edilir ki, Aişə (Allah ondan razı olsun) demişdir: "Mən Allah Elçisinin - salləllahu aleyhi və səlləm - belə buyurduğunu eşitdim: “Həqiqətən, Uca Allah mənə belə vəhy etdi: “Kim elm öyrənmək üçün yola çıxarsa, onun üçün Cənnətə gedən yolu asanlaşdıraram və kimin iki əzizini (gözlərini) əlindən alsam, bunlara görə onu Cənnətlə mükafatlandıraram. Əlavə elm öyrənmək əlavə ibadət etməkdən daha xeyirlidir, dinin əsası isə şübhəli işlərdən çəkinməkdir”.[2]