Pişiyə görə əzaba düçar olan qadın
عَنْ عَبْدِ اللَّهِ ابْنِ عُمَر أن رَسُولُ اللَّهِ ﷺ قَالَ: «عُذِّبَتِ امْرَأَةٌ فِى هِرَّةٍ حَبَسَتْهَا حَتَّى مَاتَتْ جُوعًا فَدَخَلَتِ فِيهَا النَّارَ قَالَ الله: لاَ أَنْتِ أَطْعَمْتِيهَا وَ (لاَ) سَقَيْتِيهَا حِينَ حَبَسْتِيهَا وَلاَ أَنْتِ أَرْسَلْتِيهَا فَأَكَلَتْ مِنْ خَشَاشِ الأَرْضِ»
Abdullah ibn Ömər (Allah ondan razı olsun) rəvayət edir ki, Allah Elçisi - salləllahu aleyhi və səlləm - dedi: “Pişiyə görə bir qadına əzab verildi. Qadın onu ölənə qədər ac saxlamışdı.[1] Elə buna görə də Cəhənnəmə girdi.[2] Allah ona deyəcək: “Sən o pişiyi tutub saxladığın zaman ona nə yemək, nə də su verdin. Nə də onu azad buraxdın ki, gedib yer üzündəki həşəratlardan yesin”.[3]
[1] Digər rəvayətdə: “(evə salıb) ağzını kilidləmişdir”– deyilir (əl-Buxari, 3482; Muslim, 2242). Bundan aydın olur ki, qadın bunu bilərəkdən etmişdir.
[2] Əsma bint Əbu Bəkr (Allah ondan razı olsun) rəvayət etmişdir ki, Peyğəmbər ﷺ günəş tutulduğu zaman kusuf namazını qılmış və namazını bitirdikdən sonra demişdir: “Cənnət mənə o qədər yaxınlaşdı ki, əgər ona (əl uzatmağa) ixtiyarım olsaydı, oradakı salxımlardan birini sizə gətirərdim. Habelə, Cəhənnəm də mənə o qədər yaxınlaşdı ki, axırda mən dedim: “Ey Rəbbim, yoxsa məni də onlarla bir yerə salacaqsan?” Birdən mən bir qadın gördüm və soruşdum ki: “Bu qadının günahı nədir?” (Mənə) dedilər: “Bu qadın pişiyi acından ölənədək evdə həbs etmiş, ona nə yemək vermiş, nə də onu sərbəst buraxmışdır ki, gedib özünə yemək tapsın” (əl-Buxari, 745).
[3] Cəlaləddin əs-Suyuti “Cəmius-Sağir” 7442. əl-Albani “Sahihul-Cəmius-Sağir”də (№ 3995) səhih olduğunu bildirmişdir.