Uşaq vaxtından ta indiyə qədər davam edən xəstəliyim var
Aleykumus-sələm va rahmətullahi va bərakətuhu. Sözsüz ki, bu cinlərlə bağlı bir xəstəlikdir. Müasir tibb elmi bu cür xəstəlikləri nə izah edə bilir, nə də müalicə edə bilirlər. İslam dinində isə bu xəstəliklər və onların müalicəsi haqqında geniş məlumat verilir. Siz ilk növbədə bu xəstəliyə səbir etməlisiniz və bunun mükafatını Allahdan gözləməlisiniz. Bu sizin üçün bir imtahandır. Həmçinin, bilməlisiniz ki, şəfanı verən yalnız Uca Allahdır və bu xəstəliyin davam etməsi sizin Allah dərgahında yüksək dərəcəyə çatmağınıza səbəbdir.
Peyğəmbər (sallallahu aleyhi və səlləm) demişdir: "Allah bir qulunu sevərsə, onu bəlalarla imtahan edər".
Allah Elçisi (salləllahu aleyhi və səlləm) demişdir: “İnsanın Allah dərgahında yüksək bir dərəcəsi olur. O, bu dərəcəyə əməli sayəsində nail ola bilmədiyinə görə Allah onun başına xoşagəlməz bəlalar gətirərək onu bu dərəcəyə yüksəldər”.
Uca Allah Qurani Kərimdə Əyyub peyğəmbərin (Ona Allahın salamı olsun) ağır xəstəliyə tutulması, uzun illər xəstəliyinin artmasına baxmayaraq səbir göstərməsi, sonda Uca Allahın onu sağaltması və onun səbrinə görə onu bütün insanlara nümunə etməsi barədə danışır. Hətta deyilənə görə o, on səkkiz il cüzam xəstəliyindən əziyyət çəkmişdir.
Rəvayət edilir ki, Abdullah ibn Məsud (Allah ondan razı olsun) demişdir: “Peyğəmbər (sallallahu aleyhi va səlləm) ağır xəstələndiyi zaman mən onun yanına gəldim və baxdım ki, o, qızdırma içində yanır. Dedim: “Ey Allahın Elçisi! Sən qızdırma içində yanırsan! Yəqin bu, sənin iki savab qazanmağına görədir?” O dedi: “Düzdür, başına müsibət gəlmiş elə bir müsəlman yoxdur ki, Allah, ağacın yarpaqları töküldüyü kimi, onu günahlarını təmizləmiş olmasın”. (Buxari, 5647).
Bu cür xəstəliklərdən şəfa tapmaq üçün Uca Allahın buyurduğu bütün vacib əməlləri yerinə yetirmək (fərz namazları kimi), bütün qadağaları, günahları tərk etmək və onlardan tövbə etmək lazımdır. Həmçinin, çoxlu Quran oxumaq və hər gün oxumaq üçün vaxt ayırmaq, Peyğəmbərimizin (sallallahu aleyhi va səlləm) buyurduğu zikr və dualardan istifadə etmək, səhər-axşam zikrlərini, Ayətul Kursini hər namazdan sonra, gecə yatmazdan əvvəl və səhər-axşam zikrlərində oxumaq lazımdır. Həmçinin, İxlas, Fələq və Nəs surələrini hər namazdan əvvəl və səhər-axşam zikrlərində oxumaq lazımdır. Həmçinin, dinimizin buyurduğu ruqyələri oxumaq (yəni Quran ayələrindən, zikr və dualardan ibarət olan sözləri əlin içinə oxuyub üfürmək və əlləri bədənə sürtmək). Həmçinin, bal, qara çörək otu, zəm-zəm suyu, zeytun yağı kimi buyurulan təbii ləvazimatlar istifadə etmək lazımdır. Bütün bu deyilənlər cadu, gözdəymə və digər xəstəliklərin müalicəsində istifadə edilən ən təsirli vasitələrdəndir. Allah şəfa versin!