Əbu Ləhəbin əlləri qurusun, qurudu da! (əl-Məsəd surəsi)
Mərhəmətli və Rəhmli Allahın adı ilə!
1. Əbu Ləhəbin əlləri qurusun, qurudu da!
2. Nə var-dövləti, nə də qazandıqları onu qurtara bilməyəcək.
3. O, alovlanan oda atılacaqdır.
4. Onun odun şələsi daşıyan arvadı da.
5. Arvadının boynunda xurma liflərindən kəndir olacaqdır.
əl-Məsəd (Xurma lifi) surəsinin izahı
Bu surənin nazil edilmə səbəbi haqqında İbn Abbas rəvayət edir ki, Uca Allah: "Ən yaxın qohumlarını qorxut!" (əş-Şüəra, 214) ayəsini nazil etdikdən sonra Peyğəmbər - ona və ailəsinə Allahın salavatı və salamı olsun - Səfa dağına qalxıb: “Ey Fəhr oğulları! Ey Adiy oğulları!” – deyərək qohumlarını çağırdı. Qureyşlilər onun yanına toplandı. İmkan tapıb gələ bilməyənlərin hər biri öz tərəfindən bir nümayəndə göndərdi ki, hadisə barəsində ona xəbər versin. Beləliklə, Əbu Ləhəb başda olmaqla, qureyşlilər Peyğəmbərin yanına toplandılar. O dedi: “Əgər mən sizə desəm ki, bu vadidə bir dəstə atlı var və onlar sizə hücum etmək istəyir, mənə inanarsınızmı?” Onlar dedilər: “Bəli! Bu vaxta qədər səndən yalan eşitməmişik.” O dedi: “Həqiqətən, mən sizi Allahın əzabı ilə qorxudan bir peyğəmbərəm!” Əbu Ləhəb dedi: “Ölüm olsun sənə! Bizi buna görə bura yığmısan?” Uca Allah da bu ayələri nazil etdi. (Səhih əl-Buxari).
Əbu Ləhəbin əlləri qurusun, qurudu da! Nə var-dövləti, nə də qazandıqları onu qurtara bilməyəcək
Məşhur İslam alimi Sədi demişdir: “Əbu Ləhəb Peyğəmbərin əmisidir. O, Peyğəmbərə nifrət bəsləmiş, ona əziyyət vermişdir. Onun nə dini, imanı, nə də qohumluq əlaqələrini möhkəmləndirmək üçün canfəşanlığı olmuşdur. Odur ki, Allah onu Qiyamət gününədək rüsvay edən tənə ilə alçaldıb demişdir: “Əbu Ləhəbin əlləri qurusun, qurudu da!” O, ziyana uğradı, bədbəxt oldu və heç bir qazanc əldə edə bilmədi. Allahın əzabına düçar olduqda isə haqsızlığa vadar edən mal-dövləti, qazandığı övlad və s. onu bu əzabdan qurtara bilməyəcək.
O, alovlanan oda atılacaqdır. Onun odun şələsi daşıyan arvadı da. Arvadının boynunda xurma liflərindən kəndir olacaqdır
Əbu Ləhəb alovlu Cəhənnəm oduna girəcək. Bu od həm onu, həm də onun odun daşıyan arvadı Ummu Cəmil bint Hərbi hər tərəfdən əhatə edəcək. O da Peyğəmbərə çox əziyyətlər vermiş, günah işlər görməkdə və düşmənçilik etməkdə əri ilə əlbir olmuşdur. Bu qadın Allahın elçisinə bacardığı əziyyətləri verməklə kürəyinə odun şələsi yığmaq üçün xurma ağacının liflərindən olan ipi boynunda gəzdirən odunçu kimi günahları öz boynuna yığırdı. Başqa təfsirə görə, o, Cəhənnəmdə əri yandırılan oda boynunda xurma ağacının liflərindən olan iplə odun daşıyacaq.
Sədi deyir ki, bu surədə Allahın möcüzələrindən biri açıq-aydın göstərilir. Belə ki, Uca Allah bu surəni Əbu Ləhəb və onun arvadı hələ sağ ikən nazil etmiş və onlara Cəhənnəmdə əzab çəkəcəkləri barədə xəbər vermişdir. Buna səbəb isə onların İslam dinini inkar etməsi olmuşdur. Həqiqətən, qeybdə və aşkarda olanı Bilən Allah xəbər verdiyi kimi hər ikisi kafir olaraq həlak oldular.