İstixarə mənfi çıxarsa, yenə istəmək olarmı?
Va aleykum salam. Dinimizdə "İstixarə" dedikdə, iki rükət namaz qılıb sonra görmək istədiyin işi Allaha həvalə etmək, işin xeyirli olacağı təqdirdə Allahdan onun həyata keçməsini, əks halda isə onun baş verməməsini diləmək nəzərdə tutulur. Cabir ibn Abdullah rəvayət edir ki, Peyğəmbər - ona və ailəsinə Allahın salavatı və salamı olsun - Qurandakı surələri bizə öyrətdiyi kimi istixarə duasını da bizə öyrədib deyərdi: «Sizdən biriniz bir işi görməyə qərar verdikdə fərz namazlarından əlavə iki rükət namaz qılsın və desin:
“Allahım, Səndən Öz elminlə mənə kömək etməyi və Öz qüdrətinlə mənə qüdrət verməyi diləyirəm. Səndən, Sənin böyük lütfünü diləyirəm. Şübhəsiz ki, Sənin hər şeyə qüdrətin çatır, mənimsə qüdrətim çatmır, Sən hər şeyi bilirsən, mən isə bilmirəm. Qeybləri bilən Sənsən. Allahım, bu işin (işin adını çəkir) mənim dinim, yaşayışım və aqibətim üçün tez və ya gec xeyirli olduğunu bilirsənsə, onu mənə nəsib et, asanlaşdır, sonra da onu mənim üçün bərəkətli et. Bu işin mənim dinim, yaşayışım və aqibətim üçün tez və ya gec zərərli olduğunu bilirsənsə, onu məndən, məni də ondan uzaq et! Harada olursa-olsun, mənə xeyir nəsib et, sonra məni ondan razı sal!” (əl-Buxari, 1162). Təsbehlə və digər şeylərdən istifadə edərək istixarə etmək olmaz. Bu daha çox fala baxmağa bənzəyir. Çünki qeybi Allahdan başqa heç kəs bilmir. Bütün işlərin aqibətini bilən yalnız Allahdır. Uca Allah bu xüsusda buyurur: "De: "Allahdan başqa göylərdə və yerdə olanların heç biri qeybi bilməz" (ən-Nəml, 65).
Uca Allahdan bir şey istədikdə, onun həyata keçib-keçməməsini və baş vermə zamanını Allaha həvalə etmək lazımdır. Əgər Allaha dua etdikdən sonra bir iş alınmırsa, demək ki, bu işin həmin vaxt baş verməsi xeyirli deyil. Bu zaman ümidsiz olmaq və Allah barədə pis zənnə qapılmaq olmaz. Əksinə, Allah barədə gözəl zənn edin və dua etməkdə davam edin. Uca Allah xeyirli bir vaxtda istəyinizi həyata keçirəcək. Çünki hansı işin bizim üçün daha xeyirli, hansının isə zərərli olduğunu Allahdan başqa heç kəs bilməz. Uca Allah buyurur: "Ola bilsin ki, sevmədiyiniz bir şey sizin üçün xeyirli, sevdiyiniz bir şey isə sizin üçün zərərli olsun. Allah bilir, siz isə bunu bilmirsiniz" (əl-Bəqərə, 216).
Bu səbəbdən bir xeyir iş görmək istədikdə, Peyğəmbərimiz (ona və ailəsinə Allahın salavatı və salamı olsun) buyurduğu kimi istixarə namazı qılın və dua edərək işinizi Allaha həvalə edin. İstixarə namazı barədə daha ətraflı bu linklərdən oxuya bilərsiniz: