Salam vermədən sual soruşmaq olarmı?
Aleykum salam. Dinimiz bizə salamı aramızda yaymağı buyurmuşdur və bildirmişdir ki, salamı yaymaq insanlar arasında məhəbbəti artıran səbəblərdəndir. Uca Allah buyurur: "Evlərə daxil olduğunuz zaman özünüzü Allah tərəfindən mübarək və çox xoş bir salamla salamlayın". (ən-Nur, 61). Allah Elçisi (Allahın ona və ailəsinə salavatı və salamı olsun) belə demişdir: "İman gətirməyincə Cənnətə girə bilməzsiniz. Biri-birinizi sevməyincə (tamam-kamal) iman gətirmiş olmazsınız. Sizə elə bir şey öyrədimmi ki, onu etdikdə biri-birinizi sevəsiniz?! Aranızda salamı yayın". (Səhih Muslim: 54,81; Sunən ət-Tirmizi, 2612). Bu səbəbdən bir müsəlmanın digərinə salam vermədən onunla danışması İslam əxlaqı baxımından düzgün deyil. Hətta Peyğəmbərimiz (salləllahu aleyhi və səlləm) bilərəkdən salam vermədən danışan kəsə ibrət olsun deyə onunla danışmamağı buyurmuşdur. Allah Elçisi (Allahın ona və ailəsinə salavatı və salamı olsun) demişdir: "Salam sualdan əvvəldir, kim sizə salam verməmiş sual verərsə ona cavab verməyin". ("Səhih əl-Cami" kitabı, 3699). Lakin, əgər salam vermədən danışan salam vermədən danışmağın hökmünü bilmirsə və ya unutmuşsa, bu halda ona cavab verilir və bu əməlin düzgün olmadığı ona izah edilir. Həmçinin oxuyun: Sizə salam olsun!