Borc verərkən onu yazmaq və şahid tutmaq vacibdirmi?
Əssələmu aleykum.
1) Ümumiyyətlə bir müsəlmana yardım etmək və ona borc vermək savab əməldir. Peyğəmbər (ona və ailəsinə Allahın salavatı və salamı olsun) demişdir: "Kim bir müsəlmanı dünya sıxıntılarının birindən xilas edərsə, Allah da onu qiyamət gününün bir sıxıntısından xilas edər. Kim borc içində batan insana rahatlıq verərsə onun üçün dünyada və axirətdə rahatlıq olar. Bəndə öz qardaşının köməyində olduqca, Allah da onun köməyi olar" (Muslim, 2699; Tirmizi, 4015). Həmçinin buyurur: "Bir kişi Cənnətə daxil olur və onun qapısının üzərində belə bir yazı görür: “Sədəqənin (mükafatı) on, borc verməyin (mükafatı) isə on səkkiz mislində verilir” (ət-Tabərani “Mucəmul-Kəbir” 7976; əl-Beyhəqi “Şuabul-İman” 3564). Həmçinin borcu qaytarmaqda çətinlik çəkən şəxsə möhlət vermək də böyük savabdır. Peyğəmbər (ona və ailəsinə Allahın salavatı və salamı olsun) demişdir: "Kim borcu qaytarmaqda çətinlik çəkənə möhlət verərsə və ya borcunu keçərsə, Qiyamət günü heç bir kölgənin olmadığı gündə Allah onu Ərşinin kölgəsində kölgələndirər” (ət-Tirmizi, 1306, 1354). Əgər borc istəyən şəxs qohumdursa, bu halda siz ona borc verməklə ikiqat savab qazanmış olarsız; qohumluq əlaqəsini yaxşılaşdırdığınıza görə və borc verdiyinizə görə. Odur ki, əgər borc vermək sizi sıxıntıya salmayacaqsa, bu halda borc verməyiniz daha yaxşıdır. Lakin əgər borc istəyən insan etibarlı şəxs deyilsə və borcu səbəbsiz olaraq gecikdirəcəksə, və ya borc verməklə özünüzü çətinliyə salmış olarsınızsa, bu halda yalan danışmamaq şərti ilə borc verməkdən imtina edə bilərsiniz. Həmçinin oxuyun: İslam fiqhi: BORC