Allaha dua edərkən kəramət sahiblərinin xətrini vasitə tutmaq olarmı?

Və aleykum Salam. Peyğəmbərlərin (aleyhimis-sələm) və ya kəramət sahiblərinin xatirinə və yaxud hörməti ilə Allahdan nəsə istəmək icazəli deyil. Düzdür, peyğəmbərlərin və əməlisaleh bəndələrin Allah yanında xətirləri böyükdür. Amma Peyğəmbərimiz (salləllahu aleyhi və səlləm) nə özü belə etmiş, nə də belə etməyi buyurmamışdır. Quranda və səhih hədislərdə buna aid heç bir göstəriş yoxdur. Əksinə, Uca Allah buyurur: "Ya Rəsulum! Əgər bəndələrim Məni səndən soruşsalar söylə ki, Mən onlara yaxınam. Dua edib Məni çağıranın duasını qəbul edərəm. Gərək onlar da Mənim çağırışımı qəbul edib Mənə iman gətirsinlər. Bununla da, ola bilsin ki, doğru yola yetişsinlər". (əl-Bəqərə, 186); "Biz ona şah damarından da yaxınıq". (Qaf, 16). Bu əməlin heç bir dini əsası olmadığı üçün bidət və ən böyük günah olan şirkə aparan yol sayılır. Belə ki, kəramət sahiblərinin vasitəsilə Allaha dua edənin dini bilgisi az olduğundan onun şirkə düşmək ehtimalı çoxalır. Həyatda olan, duasının qəbul olunma ehtimalı yüksək olan müsəlmandan Allaha dua etməsini xahiş etmək olar. Səhabələr (Allah onlardan razı olsun) Peyğəmbərimizin (Allahın ona və ailəsinə salavatı və salamı olsun) ölümündən sonra quraqlıq vaxtı yağış yağması üçün Allaha dua etmək üçün Peyğəmbəri (Allahın ona və ailəsinə salavatı və salamı olsun) vasitə tutmadılar. Onlar Peyğəmbərin (Allahın ona və ailəsinə salavatı və salamı olsun) həyatda olan əmisi Abbasdan (Allah ondan razı olsun) Allaha dua etməsini xahiş etdilər. (əl-Buxari).