Fatimə niyə gecə dəfn edilib və səhabələr Əliyə qarşı çıxıblarmı?

Aleykum salam. Hər müsəlman ona fayda verəcək işlərlə məşğul olmalı, axirətdə ona ziyan verəcək şeyləri tərk etməlidir. Bu mövzuya girməsəniz, qiyamət günü sizə veriləcək suallar içərisində səhabələrin arasında baş vermiş ixtilaflar olmayacaq. Uca Allah buyurur: "Onlar bir ümmət idi ki, gəlib getdilər. Onların qazandıqları özlərinə, sizin qazandığınız isə sizə aiddir. Siz onların etdikləri barədə sorğu-suala tutulmayacaqsınız". (əl-Bəqərə, 134). 
Peyğəmbər (salləllahu aleyhi və səlləm) demişdir: "Üç mövzu vardır ki, onlar barədə söhbət düşdükdə susun. Onlar -- səhabələrim, ulduzlar və qədər mövzusudur". (ət-Tabərani: "əl-Kəbir", 2/96).
Rəbbimiz həmçinin səhabələr haqqında buyurur: "Dində hamını ötüb ke­çən ilk mü­hacirlərə və ənsar­la­ra, həm­çinin yax­şı işlər gör­mək­də onların ardınca ge­dən­lərə gəlincə, Allah onlardan ra­zı­dır, onlar da Ondan razıdırlar. Allah on­­lar üçün ağac­ları altından çay­lar axan, içində əbədi qala­caq­ları Cən­nət bağ­ları hazır­lamış­dır. Bu, böyük uğur­dur". (ət-Tovbə, 100).
Səhabələr (radıyəllahu anhum) Əliyə (Allah ondan razı olsun) qarşı çıxmayıblar, Fatimənin (Allah ondan razı olsun) gecə dəfn edilməsi isə onun vəsiyyəti ilə bağlıdır. O, vəfat edərkən Əlidən 2 şeyi xahiş etmişdir: Onun ölümündən sonra bacısı qızı Umamə ilə evlənməsini (çünki o, Həsən və Hüseynin qeydinə yaxşı qalacaqdı) və həya etdiyi, insanların toplaşmasından utandığı üçün cəsədini yaxşı-yaxşı bükərək heç kimin görmədiyi vaxt, gecə dəfn etməsini.