Duasız edilən tövbə qəbul olunurmu?
Salam aleykum. Günahdan tövbə etmək peşman olmaqla, günahdan əl çəkməklə və gələcəkdə bu günahı etməmək əzmində olmaqla həyata keçirilir. Əgər edilən günahla kiminsə haqqı tapdalanırsa, bu zaman tövbəyə daha bir şərt - haqqı tapdalanan adamın halallığı əlavə olunur. Peyğəmbər (ona və ailəsinə Allahın salavatı və salamı olsun) demişdir: "Tövbə peşman olmaqdır". Tövbə, asiliyi tərk edərək Allahın itaətinə qayıtmaqdır. Bu baxımdan tövbə edən dua etmədən və istiğfar diləmədən tövbənin şərtlərini yerinə yetirərsə, tövbəsi qəbul olunar. Lakin bununla yanaşı Allahdan bağışlanma diləməklə də tövbə etmək olar. Uca Allah buyurur: "O kəslər ki, bir pis iş gördükdə, yaxud özlərinə zülm etdikdə, Allahı xatırlayıb günahlarının bağışlanmasını diləyərlər. Axı günahları Allahdan başqa kim bağışlaya bilər? Bir də onlar gördükləri pis işlərdə bilə-bilə israr etməzlər. Onların mükafatı, Rəbbindən bağışlanma və altından çaylar axan cənnətlərdir ki, orada əbədi qalacaqlar. Yaxşı əməl sahiblərinin mükafatı necə də gözəldir!" (Ali İmran, 135-136).
Peyğəmbərimiz (ona və ailəsinə Allahın salavatı və salamı olsun) bizə tövbə etmək və bağışlanma diləmək üçün xüsusi dualar öyrətmişdir. Bu dualardan biri də "Seyyidul-İstiğfər" (Ən üstün bağışlanma duası) kimi məşhur olan duadır. Şəddad ibn Ovs (Allah ondan razı olsun) rəvayət edir ki, Peyğəmbər (ona və ailəsinə Allahın salavatı və salamı olsun) demişdir: "Ən üstün istiğfar belədir: "Allahım, Sən mənim Rəbbimsən. Səndən başqa məbud yoxdur. Məni Sən yaratdın və mən Sənin qulunam. Bacardığım qədər Sənə verdiyim əhdə və vədə sadiq qalacağam. Etdiklərimin şərindən Sənə sığınıram. Mənə verdiyin neməti etiraf edirəm və günahımı boynuma alıram. Məni bağışla! Şübhəsiz ki, günahları yalnız Sən bağışlayırsan!" (Allahummə, əntə rabbi lə iləhə illə ənt, xaləqtəni və ənə abdukə və ənə alə ahdikə və vədikə məs-tətətu, əuzu bikə min şərri mə sənətu. Əbuu ləkə binimətikə aleyyə və əbuu ləkə bizənbi. Fəğfirli fə innəhu lə yəğfiruz-zunubə illə ənt) (Sonra Peyğəmbər) buyurdu: "Kim gündüz vaxtı bu duanı yəqinliklə deyər və həmin gün axşam düşməzdən əvvəl ölərsə, Cənnət əhlindən olar. Habelə kim axşam ikən bunu yəqinliklə deyər və səhər açılmazdan əvvəl ölərsə, Cənnət əhlindən olar" (əl-Buxari, 6306). Tövbə üçün digər dualar da mövcuddur.
Həmçinin, tövbə edərkən iki rükət namaz qılıb istiğfar diləmək də olar. Peyğəmbər (sallallahu aleyhi və səlləm) demişdir: "Günah etdikdən sonra dəstəmaz alıb iki rükət namaz qılan və Allahdan günahına görə bağışlanma diləyən elə bir qul yoxdur ki, Allah onu bağışlamasın" (İbn Hibban, 623).
Həmçinin, tövbə etdikdən sonra yaxşı işlərə can atmaq günahların silinməsinə səbəbdir. Çünki yaxşı işlər günahları silib aparır. Uca Allah buyurur: "Gündüzün iki başında – əvvəlində və axırında və gecənin bəzi saatlarında namaz qıl! Həqiqətən, yaxşı işlər pis əməlləri silib aparır. Bu, yada salanlar üçün bir xatırlatmadır" (Hud, 114).
Tövbə barədə daha ətraflı bu linklərdən oxuyun:
Tövbə etsəm, Allah məni bağışlayarmı?