Cinlər insan və heyvan şəklinə girə bilərmi?

Əssələmu aleykum. Uca Allah cinlərə həm insan, həm də heyvan şəklinə düşmək bacarığı vermişdir. Bunu təsdiqləyən bir çox hədislər var. Həmçinin həyatda da bunu təsdiqləyən bir çox hadisələr olmuşdur. Aşağıdakı hədislər buna dəlalət edir:

 Əbu Səid əl-Xudri (Allah ondan razı olsun) rəvayət etmişdir ki, Peyğəmbər (ona və ailəsinə Allahın salavatı və salamı olsun) demişdir: "Mədinədə bir neçə cin İslamı qəbul etmişlər. Kim evində ilan görərsə ona üç dəfə evi tərk etməyi təklif etsin. Əgər bundan sonra yenə bu ilanla qarşılaşarsa onu öldürsün, çünki o şeytandır". (Muslim, 2236). 

Həmçinin başqa bir hədisdə Əbu Hureyraya (Allah ondan razı olsun) insan cildində görsənmişdir. Rəvayət edilir ki, Əbu Hureyra (Allah ondan razı olsun) demişdir: "(Bir dəfə) Peyğəmbər (ona və ailəsinə Allahın salavatı və salamı olsun) rama­zan ayında yığıl­mış zəkatı qoruyub saxlamağı mənə tapşırdı. Bu əsnada bir nəfər yanı­ma gəldi və ər­zaq­dan ovuclayıb (qabına) yığmağa başladı. Mən onu yaxalayıb dedim: "Vallahi, mən səni mütləq Peyğəmbərin (ona və ailəsinə Allahın salavatı və salamı olsun) yanına apa­ra­ca­ğam.” O yalvarıb: "Mən buna möhtacam, mənim külfətim var, özümün də (bu yeməyə) olduqca ehtiyacım var"– dedi, mən də onu buraxdım. Ertəsi gün Peyğəmbər (ona və ailəsinə Allahın salavatı və salamı olsun) məndən soruşdu: “Ey Əbu Hureyra! Tutduğun əsir nə etdi?” Mən dedim: "Ya Rəsulallah! O (mənə) həm ehtiyaclı, həm də külfət sa­hibi olduğundan gileyləndi. Buna görə də mənim ona yazığım gəldi və onu buraxdım". Peyğəmbər (ona və ailəsinə Allahın salavatı və salamı olsun) dedi: “O sənə yalan danışıb və o yenə qayıda­caq”. Mən bilirdim ki, o qayıdacaq, çünki Peyğəmbər (ona və ailəsinə Allahın salavatı və salamı olsun): “...o yenə qa­yı­da­caq”– deyə xəbər vermişdi. Odur ki, pusquda durub onu gözlədim. O, yenə gəlib ərzaqdan ovuclayaraq (qabına) yığmağa baş­ladı. Mən onu yaxalayıb dedim: "Səni hökmən Pey­ğəmbərin (ona və ailəsinə Allahın salavatı və salamı olsun) yanına aparacağam". O yalvarıb dedi: "Burax məni! Doğrudan da, mən buna möhtacam və mənim külfətim var. (Söz verirəm ki,) bir daha (bura) qayıtmayaca­ğam". Mənim ona yazığım gəl­di və mən yenə onu burax­dım. Ertəsi gün Peyğəmbər (ona və ailəsinə Allahın salavatı və salamı olsun) mən­dən soruşdu: “Ey Əbu Hureyra! Dünən tutduğun əsir nə etdi?” Mən dedim: "Ya Rə­su­lal­lah! O, (mənə) həm möhtac, həm də külfət sahibi olduğundan giley-güzar elə­di. Buna görə də mənim ona yazığım gəldi və mən onu burax­dım". Pey­ğəm­­bər (ona və ailəsinə Allahın salavatı və salamı olsun) dedi: “O sənə yalan danışıb və o yenə qayıdacaq". Mən üçüncü dəfə pusquda dayanıb onu gözlə­dim. O, yenə gəlib ərzaqdan ovuclayaraq (qa­bına) yığ­mağa başladı. Mən onu yaxalayıb dedim: "Mən səni hökmən Pey­ğəm­bərin (ona və ailəsinə Allahın salavatı və salamı olsun) yanına aparacağam. Artıq üçüncü dəfədir ki, sən qayıt­ma­ya­ca­ğına söz verir, sonra da qayıdırsan". O yalvarıb dedi: "Məni bu­raxsan, sə­nə elə sözlər öyrədərəm ki, Allah onların vasitəsilə sənə fayda verər". Mən: "O nə sözdür?"– deyə soruş­dum. O dedi: "Yatağına uzananda Kürsü – “Allah, Ondan başqa ilah yoxdur, əbə­di Yaşayandır, bütün yaratdıqlarının Qəyyu­mu­dur...” (əl-Bəqərə, 255) – ayəsini axıra qədər oxu. Əgər bunu etsən, səhər yuxudan oyana­nadək sənin ya­nında Allahın təyin etdiyi gözətçi (bir mələk) durar və şeytan sənə yaxınlaşmaz". Mən yenə onu buraxdım. Səhəri gün Peyğəmbər (ona və ailəsinə Allahın salavatı və salamı olsun) mən­dən soruşdu: “Dünən tutduğun əsir nə etdi?” Mən dedim: "Ya Rəsulallah! O, Allahın izni ilə mənə faydası olacaq sözlər öyrədə­cəyini söylədi və mən də onu buraxdım". Peyğəmbər (ona və ailəsinə Allahın salavatı və salamı olsun): “Nədir o?”– deyə soruşdu. Mən dedim: "O mənə söylədi ki, yatağına uzananda Kürsü – “Allah, Ondan başqa ilah yox­dur, əbə­di Yaşayandır, bütün yaratdıqla­rının Qəyyumu­dur...” – ayəsini əv­vəldən axıra qədər oxu. Əgər bunu etsən, səhər yuxudan oyana­nadək sənin yanında Allahın təyin etdiyi gözətçi (bir mələk) durar və şeytan sənə ya­xın­laş­maz.” Səhabələr xeyirli işlərə ən çox can atan insanlar idi. Peyğəmbər (ona və ailəsinə Allahın salavatı və salamı olsun) dedi: “O sənə doğru söylədi, halbuki özü qatı yalan­çıdır. Sən üç gecədir kiminlə söhbət etdiyini bilirsənmi, ey Əbu Hureyra?” Mən: "Xeyr!"– deyə cavab verdikdə, Pey­ğəmbər (ona və ailəsinə Allahın salavatı və salamı olsun) dedi: “Bu, şeytan idi!” (əl-Bu­xa­ri, 2311).

Bu hədislər göstərir ki, cinlər həm insan, həm də heyvan şəklini ala bilirlər. Həmçinin oxuyun:

Şeytan nədir?