əl-Ənam surəsinin 92-ci ayəsinin təfsiri
Əssələmu aleykum. Uca Allah əl-Ənam surəsi 92-ci ayədə belə buyurur: "Bu, şəhərlər anası Məkkəni və onun ətrafındakıları qorxutmaq üçün nazil etdiyimiz, özündən əvvəlkiləri təsdiq edən mübarək bir Kitabdır. Axirətə inananlar ona da inanırlar. Onlar namazlarını doğru-düzgün qılırlar". Böyük Müfəssir İbn Kəsir (Allah ona rəhmət etsin) bu ayənin təfsirində belə demişdir:
Uca Allah buyurur: "Bu", yəni Quran, “şəhərlər anası Məkkəni və onun ətrafındakıları”, yəni həm ərəb qəbilələrini, həm də ərəb olmayan Adəm övladlarının digər tayfalarını xəbərdar edəsən deyə, sənə nazil etdiyimiz mübarək Kitabdır. Necə ki Uca Allah başqa ayələrdə belə buyurur: “De: “Ey insanlar! Şübhəsiz ki, mən sizin hamınız üçün Allahın elçisiyəm” (əl-Əraf, 158); “Bu Quran mənə, onunla sizi və onun yetişəcəyi hər kəsi xəbərdar etməyim üçün vəhy olundu” (əl-Ənam, 19), “Onu inkar edən firqələrin vəd olunduğu yer oddur” (Hud, 17); “Aləmləri xəbərdar etməsindən ötrü Öz quluna Furqanı nazil edən Allah ən Əzəmətli, xeyiri və bərəkəti bol olandır!” (əl-Furqan, 1); “Kitab verilənlərə və savadsızlara de: “Siz də, təslim oldunuzmu?” Əgər təslim olsalar, doğru yola yönəlmiş olarlar. Yox, əgər üz döndərsələr, bil ki, sənin öhdənə düşən ancaq haqqı təbliğ etməkdir. Allah qullarını görəndir” (Ali-İmran, 20). əl-Buxari və Muslimin "Səhih" əsərlərində rəvayət edilən bir hədisdə Peyğəmbər (Allahın ona və ailəsinə salavatı və salamı olsun) demişdir: “Mənə beş (xislət) verilib ki, bunlar məndən əvvəl heç bir kəsə verilməmişdir: ...”, bu xislətlərdən biri də budur: “Hər bir peyğəmbər yalnız öz qövmünə göndərilərdi, mən isə bütün insanlara göndərilmişəm”. (əl-Buxari, 323, 335). Bu səbəbdən Uca Allah: “Axirətə inananlar ona da inanırlar”– buyurur. Yəni, “Ey Muhəmməd, Allaha və Axirət gününə inanan hər kəs sənə nazil etdiyimiz mübarək Kitab olan Qurana da inanar”. “Onlar namazlarını doğru-düzgün qılırlar”, yəni onlar özlərinə fərz edilmiş namazları vaxtlı-vaxtında qılarlar".