əl-Ənbiya surəsi 30-cu ayənin təfsirini bilmək istərdim
Və aaleykum Salam. Sualda qeyd etdiyiniz ayə əl-Ənbiya surəsinin 30-cu ayəsidir. Uca Allah bu ayədə buyurur: "Məgər kafirlər görmürlərmi ki, göylərlə yer bir olduğu zaman Biz onları bir-birindən araladıq və hər bir canlını sudan yaratdıq? Yenədəmi inanmırlar?" (əl-Ənbiya, 30).
Böyük təfsir alimi İbn Kəsir (Allah ona rəhmət etsin) bu ayənin təfsirində belə demişdir: "Uca Allah varlıqları yaratmada qüdrətinin kamilliynə, səltənətinin əzəmətliyinə, bütün məxluqatı üzərində mütləq hakimiyyətinə işarə edərək belə buyurur: “Məgər kafirlər görmürlərmi”, yəni Uca Allahın məbud olduğunu inkar edənlər, Onunla yanaşı başqa məbudlara ibadət edənlər bilmirlərmi ki, Allah yeganə yaradan, yeganə idarə edəndir. Elə isə Allahdan başqası ibadət edilməyə və Ona şərik qoşulmağa necə layiq ola bilər? “Məgər kafirlər görmürlərmi ki, göylərlə yer bir olduğu zaman Biz onları bir-birindən araladıq”, yəni göylərlə yer başlanğıcda bir-birinə bitişik, bir-birinin üzərində sıxılmış vəziyyətdə idi. Sonra Uca Allah onlardan birini digərindən ayırdı, göyləri və yer üzünü yeddi qat etdi. Dünya səması ilə yer üzünü hava ilə bir-birindən ayırdı. Göy yağış yağdırdı və yer üzü bitkilərini bitirdi. Odur ki Uca Allah ayənin davamında belə buyurur: “...və hər bir canlını sudan yaratdıq? Yenədəmi inanmırlar?” Yəni onlar gözləri ilə varlıqların tədricən əmələ gəlməsinin şahidi olurlar. Bu isə istədiyini yaratmağa qadir olan, istədiyini yaradan Allahın varlığına dəlildir.
Rəvayət edilir ki, bir dəfə bir kişi İbn Ömərin (Allah ondan razı olsun) yanına gəlib ondan Uca Allahın “...göylərlə yer bir olduğu zaman Biz onları bir-birindən araladıq...” ayəsi barədə soruşdu. İbn Ömər (İbn Abbasa işarə edərək) dedi: "O yaşlı kişinin yanına get və ondan bu barədə soruş. Sonra gəl, sənə nə dediyini mənə də xəbər ver!” Kişi İbn Abbasın yanına gedib ondan bu ayə barədə soruşdu. İbn Abbas belə dedi: “Bəli, göylər bitişik idi, yağış yağdırmırdı. Yer üzü bitişik idi, bitki bitirmirdi. Uca Allah yer üzünün sakinlərini yaratdıqda, göyləri yağış yağdıran, yer üzünü isə bitki bitirən etdi”. Kişi İbn Ömərin yanına qayıdıb bunları ona xəbər verdi. İbn Ömər dedi: “İndi, həqiqətən, İbn Abbasa Quran elmi verildiyini bildim. Doğru söyləmişdir, həqiqətən, elə idi”. İbn Ömər dedi: “Mən əvvəllər İbn Abbasın Quranı təfsir etmək cürətinə təəccüblənərdim. İndi isə ona, həqiqətən, Quran barədə elm verildiyini bildim”. (İbn Əbu Hatim, 14504).