Dualarım qəbul olmur, nə edim?

    28.10.2014
Sual: 
men dua edirem duallarim qebul olmur ne edim mene bir yol oyredim
Cavab: 

Salam aleykum. Duaların qəbul olunması üçün Peyğəmbərimiz (salləllahu aleyhi və səlləm) müxtəlif vasitələr bildirmişdir:

  • Namazlarda dua etmək; "Bəndənin Rəbbinə ən yaxın olduğu halı onun səcdə vəziy­­yə­ti­dir. Odur ki, (səcdədə) duaları çoxaldın!" (Muslim, 482). Peyğəmbərdən (Ona və ailəsinə Allahın salavatı və salamı olsun) "Hansı dua daha çox eşidiləndir" - deyə soruşduqda O: "Gecənin axır vaxtı və fərz namazının sonunda edilən dua" - deyə cavab vermişdir. (ət-Tirmizi, 3499).
  • Haramlardan çəkinmək; Peyğəmbər (Ona və ailəsinə Allahın salavatı və salamı olsun) buyurur: "Uzun bir səfərə çıxmış bir kişi saçları dağınıq, paltarı tozlu halda əllərini səmaya uzadaraq: "Ey Rəbbim! Ey Rəbbim" deyər, lakin yediyi haram, içdiyi haram, geydiyi haram, haramla bəslənən olsa, beləsinin duası necə qəbul olunsun?" (Muslim, 1686).
  • Fikri toplamaq, Uca Allaha ürəkdən yalvarmaq. Peyğəmbər (Allahın ona və ailəsinə salavatı və salamı olsun) demişdir: "Bilin ki, Allah qafil qəlbdən çıxan duanı qəbul etməz". (ət-Tirmizi, 3707).
  • Yaxşı işlər görmək. Uca Allah buyurur: "O, iman gətirib yaxşı əməllər edənlərin duasını qəbul edər və Öz lütfünü onlara artırar". (əş-Şura, 26).
  • Tələsməmək. Allah Rəsulu (salləllahu aleyhi və səlləm) buyurmuşdur: "Qul tələsmədən, günah və qohumluq əlaqələrinin kəsilməsi üçün dua etmədikcə diləyi qəbul olunmaqda davam edər". Soruşdular: "Ey Allahın Rəsulu, tələsmək nədir?" Belə buyurdu: "Deyər ki, çoxlu dua etdim amma duam qəbul olmadı. O zaman bezər və duanı tərk edər". (Muslim, 2736). Həmçinin demişdir: "Hər bir müsəlman günah və qohumluq əlaqələrinin kəsilməsini tələb etmədən dua edərsə, Uca Allah ona bu üç şeydən birini mütləq verər: Ya istədiyini tezliklə verər, ya Qiyamət gününə saxlayar, ya da etdiyi duanın müqabilində bəlanı ondan uzaqlaşdırar". (İmam Əhməd, 3/18).
  • Gecənin son üçdə birində dua etmək. Peyğəmbər (salləllahu aleyhi və səlləm) demişdir: "Rəbbimiz hər gecə dünya səmasına enər və gecənin axırıncı üçdə biri olduğu vaxt deyər: Mənə dua edən bir kimsə varmı onun duasını qəbul edəm?! Məndən istəyən bir kimsə varmı onun dilədiyini verəm?! Məndən bağışlanma diləyən bir kimsə varmı onu bağışlayam?!" (əl-Buxari; Muslim). Daha ətraflı: Gecə namazı necə qılınır?
  • Nafilə (əlavə) ibadətlər etmək.  Peyğəmbər (salləllahu aleyhi və səlləm) demişdir ki, Rəbbimiz buyurur: "Qulum mənə nafilə ibadətlərlə durmadan yaxınlaşar. Nəhayət, mən onu sevərəm. Qulumu sevdiyim zaman da mən onun eşidən qulağı, görən gözü, tutan əli və yürüyən ayağı olaram. Məndən nə istəsə onu mütləq verərəm, mənə sığınsa onu qoruyaram". (əl-Buxari).
  • Duaların qəbul olunduğu vaxt və məqamlardan istifadə etmək. Bunlara daxildir: Cümə günü edilən dua, azan və iqamə arasında edilən dua, yağış yağarkən, oruclu olarkən olunan dualar, habelə səfərdə olan müsafirin duası, valideynin övladı üçün etdiyi dua və s. Daha ətraflı: Duanın qəbul olan vaxtları və məqamları hansılardır?
  • Duanın ədəblərinə riayət etmək. Daha ətraflı: Duanın ədəbləri haqqında
Teqlər: 
Paylaş: