Möhürsüz namaz qılmaq olar?

Aleykum salam. Namazı Allah Rəsulunun (Ona və ailəsinə Allahın salamı və salavatı olsun) buyurduğu kimi qılmaq lazımdır. Bir hədisdə peyğəmbər əshabələrinə "məni necə namaz qılan gördünüz, elə də qılın" - deyə əmr edir. Möhürlə namaz qılmağa gəlincə onu qeyd edə bilərik ki, peyğəmbərimiz möhürsüz namaz qılmışdır. Elə ona görə də möhürlə namaz qılmaq dində yenilikdir. Həmçinin peyğəmbər belə demişdir: "Bizim işimizə (dinimizə) müvafiq olmayan bir əməl edən kimsənin etdiyi əməli rədd edilir". (Səhih Muslim).
Bu hədis onu göstərir ki, kim dinə yeni bir şey gətirərsə, o əməl ondan qəbul olunmaz. Hər bir müsəlman dinə, ibadətə aid olan şeyləri yalnız Allahın elçisindən götürməlidir. Uca Allah buyurur: "Həqiqətən, Allahın Rəsulu, Allaha, qiyamət gününə ümid bəsləyənlər (Allahdan, qiyamət günündən qorxanlar) və Allahı çox zikr edənlər üçün gözəl bir örnəkdir!" (əl-Əhzab, 21).
Digər ayədə isə belə deyir: "(Ya Rəsulum!) De: “Əgər siz Allahı sevirsinizsə, mənim ardımca gəlin ki, Allah da sizi sevsin və günahlarınızı bağışlasın. Allah bağışlayandır, mərhəmətlidir!" (Ali İmran, 31).