Yuxuda vergi verildiyini və gələcəkdən xəbər verdiyini deyən insan haqlıdırmı?
Və aleykum Salam. Yuxuda görülən hər bir şeyə inanmaq olmaz, çünki yuxu şeytandan da ola bilər. Peyğəmbər (salləllahu aleyhi və səlləm) demişdir: "Yuxular üç növdür: Allahdan olan yuxu, Şeytandan olan qəmginlik gətirən yuxu, insanın oyaq olarkən fikirləşdiyi şeyləri yatarkən yuxuda görməsi". (əl-Buxari, 6499; Muslim, 4200). Əgər yuxuda insana Allahın əmrlərinə zidd olan şeylər təlqin edilirsə, bu yuxulara fikir vermək lazım deyil. Məsələn, yuxuda qeyb haqda xəbər vermək, özünü murdarlamağı əmr etmək və s. şeylər şeytanın insanı böyük günahlara sövq etmək üçün işlətdiyi hiylələrindəndir. İnsana gələcəkdən xəbər haqda vergi verilə bilməz, çünki bu qeyb aləmindən olan məlumatdır. Əgər kimsə bunu iddia edirsə, artıq küfrə ilk addımını atmışdır. Həmin şəxs özünü Allahın əzabından xilas etməsi üçün tezliklə bu əməldən tövbə etməlidir. Uca Allah gələcəkdə baş verəcək bəzi hadisələri yalnız peyğəmbərlərə bildirmişdir. Uca Allah buyurur: "Allah sizə qeybi bildirən deyildir. Lakin, Allah Öz elçilərindən istədiyini seçər". (Ali-İmran, 179). Hətta, Allahın seçdiyi və ən üstün Peyğəmbər etdiyi Muhəmmədə (Allahın ona və ailəsinə salavatı və salamı olsun) qeyb haqda məlumat məhdud şəkildə verilmişdir: "De: "Mən Allahın istədiyindən başqa özümə nə bir fayda, nə də bir zərər yetirməyə qadir deyiləm. Əgər qeybi bilsəydim, əlbəttə, özüm üçün xeyir artırardım və mənə pislik toxunmazdı. Mən sadəcə, iman gətirən bir qövm üçün qorxudan və müjdələyənəm". (əl-Əraf, 188). Falçılar və kahinlərə sual veririk: Siz daha xeyirlisiniz, yoxsa Allahın elçisi? Allah öz peyğəmbərindən belə gizli saxladığı məlumatı hansısa falçıya bildirmir, deməli bu məlumatlar şeytandandır. Peyğəmbər (salləllahu aleyhi və səlləm) buyurub: "Həqiqətən, mələklər buludların içində yerə doğru enir və göydə verilmiş qərar bərəsində söhbət açırlar. Bu vaxt şeytanlar mələklərə oğrun-oğrun qulaq asırlar, sonra da eşitdikləri adda-budda sözləri, üstəlik özlərindən uydurduqları yüz yalanı da bu doğru xəbərlə yanaşı kahinlərə təlqin edirlər". (əl-Buxari, 3210). Falçıların qeyb haqda necə xəbər verməsini bu linkdən oxuya bilərsiniz:
Falçılar necə olur ki, doğru xəbər verirlər?
Allah tərəfindən kiməsə vergi verilə bilərmi?
Yuxuda insana vergi verilə bilərmi?
Həmçinin oxuyun:
Tövbə etsəm, Allah məni bağışlayarmı?
Yuxu haqqında