"Yanından qovma!"- əl-Ənam surəsi 52 - ci ayə
“Rəbbinin Üzünü diləyərək səhər və axşam çağı Ona dua edənləri yanından qovma! Nə sən onların verəcəkləri hesabata azca da olsa cavabdehsən, nə də onlar sənin verəcəyin hesabatında azca da olsa cavabdehdirlər. Onları qovsan zalımlardan olarsan”
Rəvayət edilir ki, Səd (Allah ondan razı olsun) bu ayə “Rəbbinin Üzünü diləyərək səhər və axşam çağı Ona dua edənləri yanından qovma…” (əl-Ənam, 52) haqda demişdir: “Bu ayə altı nəfər barəsində nazil oldu. Mən və İbn Məsud o altı nəfərdən idik. Müşriklər Peyğəmbərə - sallallahu aleyhi və səlləm: “Onları yanından qov!”- dedilər (və bu ayə nazil oldu).
Muslim, 4433, 6393.
Rəvayət edilir ki, Səd (Allah ondan razı olsun) demişdir: “Biz altı nəfər Peyğəmbərlə - salləllahu aleyhi və səlləm - bir yerdə idik. Müşriklər Peyğəmbərə - sallallahu aleyhi və səlləm - dedilər: “Bunları özündən uzaqlaşdır ki, cürət edib bizə qarşı çıxmasınlar”. Bu zaman mən, İbn Məsud, Huzeyl qəbiləsindən olan bir kişi, Bilal və adlarını bilmədiyim iki kişi onunla birlikdə idik. Peyğəmbər - sallallahu aleyhi və səlləm - bizi öz yanından uzaqlaşdırıb-uzaqlaşdırmayacağı barədə fikirləşdikdə, Uca Allah bu ayəni nazil etdi: “Rəbbinin Üzünü diləyərək səhər və axşam çağı Ona dua edənləri yanından qovma…” (əl-Ənam, 52)”.
Muslim, 4434, 6394; İbn Macə, 4128; İbn Kəsir “Təfsir” 5/152.