Həyatı sıxıntılı olan və ölümü arzulayan kəs nə etməlidir?

Və aleykum Salam. Uca Allah insanı yalnız Ona ibadət etmək üçün yaratmışdır. Allaha ibadət etmək insanın həyatının mənasıdır. Uca Allah buyurur: "Mən cinləri və insanları ancaq Mənə ibadət etmək üçün yaratdım. Mən onlardan ruzi istəmirəm. Mən onlardan Məni yedirtmələrini də istəmirəm. Həqiqətən, Allah ruzi verəndir, qüvvət sahibidir, Mətindir". (əz-Zariyat, 56-58). 
Belə sıxıntıların yaranma səbəbi Allahdan uzaq düşməkdir. Uca Allah bu xüsusda buyurur: "Kim Mənim Zikrimdən  (Mənə ibadət etməkdən) üz döndərsə, onun güzəranı sıxıntılı olacaq və Biz Qiyamət günü onu kor kimi hüzurumuza gətirdəcəyik. O deyəcək: "Ey Rəbbim! Mən dünyada görürdümsə, indi nə üçün məni kor olaraq gətirdin?" Allah deyəcək: "Elədir! Çünki sənə ayələrimiz gəldi, sən isə onları unutdun. Bu gün də sən beləcə unudulacaqsan!" (Taha, 124-126).
Bunun əksi olaraq kim Allaha üz tutarsa, Ona ibadət edərsə, Uca Allah onu dünya və Axirət sıxıntılarından qurtarar. Uca Allah bu xüsusda buyurur: "Allah, Onun rizasını arayan şəxsləri bu Kitabla əmin-amanlıq yollarına yönəldir, onları Öz izni ilə zülmətlərdən nura çıxarır və düz yola yönəldir". (əl-Maidə, 16).
Bu səbəbdən həyatınızı Allahın dininə uyğun şəkildə qurmağa çalışın və İslam dinini öyrənin. Həmçinin, bilmək lazımdır ki, Peyğəmbərimiz (salləllahu aleyhi və səlləm) özünə ölüm arzulamağı qadağan edərək belə demişdir: "Sizdən heç kəs başına gələn müsibətə görə ölüm arzulamasın. Əgər ölümü mütləq arzulamaq istəyərsə, belə desin: Allahım, əgər yaşamaq mənim üçün daha xeyirlidirsə, məni yaşat! Əgər ölüm mənim üçün daha xeyirlidirsə, məni öldür!" (Səhih əl-Buxari, 6351; Səhih Muslim, 2680). Həmçinin oxuyun: 
Əlacsız qalıb ruhdan düşəndə hansı duaları oxumaq lazımdır?
Dualarım qəbul olmur deyə yaşamaqdan bezmişəm...
İmanı artırmaq üçün nə etmək lazımdır?
Dəstəmaz almaq qaydası - VİDEO
Namaz qılmaq qaydası - VİDEO