"Allah Özünə şərik qoşulmasını əsla bağışlamaz" (ən-Nisa, 48) ayəsinin mənası nədir?

    03.01.2023
Sual: 
Salam. Quranda yazılıb ki «Allah Özünə şərik qoşulmasını bağışlamaz, bundan başqa [günahları] isə dilədiyi kimsəyə bağışlayar.» 1. Burda tövbə edilməyən haldan söhbət gedir yoxsa ümumiyyətlə deyilir? Yəni əgər adam şərik qoşsa və sonra tövbə eləsə bağışlana bilərmi? Və ya hər hansı başqa günah eləsə amma tövbə etməsə bağışlana bilərmi? 2. Sizcə niyə məhz şirk bağışlanmayan günahdır? Bu dünyada edilən o qədər dəhşətli şeylər ola-ola məhz şirk ən ağır günah sayılır. Sizə qarşı kimsə bir pislik edibsə bu hər halda şirk yox, başqa bir günah olub. 3. Ateist olmaq şirkdirmi? Məsələn ateistlər deyir ki, Zevs necə ki uydurmadır Allah da uydurmadır, amma Allahla yanaşı başqa şeyə ibadət etmirlər.
Cavab: 

Va aleykum Salam.

1) Ayənin düzgün tərcüməsi belədir: "Allah Özünə şərik qoşulmasını əsla bağışlamaz, bundan aşağı olan günahları isə istədiyi kimsəyə bağışlayar" (ən-Nisa, 48, 116). Bu ayədə tövbə edilməyən və Allahın hüzuruna Ona şərik qoşaraq gələn insanlar nəzərdə tutulur. Dünyada ikən tövbə edilən günahları isə Uca Allah böyüklüyündən və kiçikliyindən asılı olmayaraq bağışlayır. İbn Kəsir (Allah ona rəhmət etsin) bu ayənin təfsirində belə deyir: "Uca Allah bildirir ki, “Allah Özünə şərik qoşulmasını əsla bağışlamaz”, yəni Allahın hüzuruna Ona şərik qoşaraq gələn heç bir qulu bağışlamayacaqdır, “bundan aşağı olan günahları isə istədiyi kimsəyə bağışlayar”. 

Allaha şərik qoşub sonra tövbə edən insan bağışlanır. Qiyamət günü Allahın hüzuruna şərik qoşmaqdan aşağı olan günahlarla gələn şəxsi isə Uca Allah bağışlaya da bilər, bağışlamaya da bilər. Bu günahların bağışlanması Allahın istəyi altındadır. Ətraflı oxuyun:


2) Allaha şərik qoşmağın Qiyamət günü bağışlanmayan bir günah olmasının səbəbi budur ki, Allaha şərik qoşmaq Uca Allaha qarşı cinayətdir. Abdullah ibn Məsud (Allah ondan razı olsun) demişdir: "Bir dəfə mən Peyğəmbərdən (ona və ailəsinə Allahın salavatı və salamı olsun) hansı günahın daha böyük olmasını soruşdum? O dedi: "Allah səni yaratdığı halda, başqasını ona ortaq qoşmağın". Mən dedim: Bəs sonra? O dedi: "Övladının sənin ruzindən yeyəcəyindən qorxub, onu öldürmək". Mən dedim: Bəs sonra? O dedi: "Qonşunun halal qadını ilə zina etmək" (əl-Buxari, 6811; Muslim, 86). Ətraflı oxuyun:


3) Ateist olmaq Allaha şərik qoşmaqdan da böyük günahdır. Çünki ateist Uca Allahın inkar edir və kainatın öz-özünə yarandığını deyir. Əvvəl qeyd etdiyimiz ayədə Uca Allah "bundan aşağı olan günahları isə istədiyi kimsəyə bağışlayar" buyurur. Allahı inkar etmək Allaha şərik qoşmaqdan böyük günahdır. Bəzi günahlar Allaha şərik qoşmaqdan da böyük günahdır. Məsələn: Dinə isteza etmək, Allahı inkar etmək, Allahın ayinlərini (Quranı, peyğəmbərləri və s.) alçaltmaq və s. Bu günahlar Allaha şərik qoşmaqdan böyük olduğu üçün Qiyamət günü tövbə edilməyibsə, bağışlanmayacaq. 

Teqlər: 
quran
Paylaş: