Peyğəmbərin namaz qıldığı kimi qılmayanın namazı qəbul olacaqmı? İbadətlərin qəbul olunması üçün şərtlər hansılardır?
Sual:
Salam.insanlar ayri ayri mesheblere qulluq edirler.butun meshebler Allaha inanir onun yolunda namaz qilirlar.bes axiretde yalniz bir meshebmi dogru olacaq.peygemberimiz (sallallahu eleyhim ve sellem) qilan kimi qilmayanlarin namazi qebul olmayacaqmi.?
Cavab:
Aleykum salam.
- Cavabı buradan oxuyun: Hansı məzhəb düzgündür?
- Namazın qəbul olub-olmayacağını yalnız Allah bilir. Amma ümumən Peyğəmbər (salləllahu aleyhi və səlləm) ibadətlərin qəbul olunması üçün aşağıdakı şərtləri bildirmişdir.
- Yalnız Allaha ibadət etmək, şərik qoşmamaq. Uca Allah buyurur: "De: "Mənə Allahdan qeyrisinəmi ibadət etməyi əmr edirsiniz, ey cahillər?" Sənə və səndən əvvəlkilərə belə vəhy olunmuşdur: "Əgər şərik qoşsan, əməlin puç olacaq və mütləq ziyana uğrayanlardan olacaqsan. Sən yalnız Allaha ibadət et və şükür edənlərdən ol!" (əz-Zumər, 64-66). "De: "Şübhəsiz ki, mənim namazım da, qurbanım da, həyatım da, ölümüm də aləmlərin Rəbbi Allah üçündür!" (əl-Ənam, 162).
- İxlas (səmimiyyət). Edilən əməldə yalnız Allah rizasını güdmək. "(İblis) dedi: "Sənin qüdrətinə and olsun ki, onların hamısını yoldan çıxaracağam; Təkcə Sənin seçilmiş (ixlaslı. sadiq) qullarından başqa!" (Sad, 82-83).
- Əməli peyğəmbərin (salləllahu aleyhi və səlləm) dediyinə uyğun etmək. Uca Allah buyurur: "De: “Əgər siz Allahı sevirsinizsə, mənim ardımca gəlin ki, Allah da sizi sevsin və günahlarınızı bağışlasın. Allah Bağışlayandır, Rəhmlidir". (Ali İmran, 31); "Allah və Onun Elçisi bir işə hökm verdiyi zaman heç bir mömin kişi və mömin qadın öz işlərində istədikləri qərarı verə bilməzlər. Allaha və Onun Elçisinə asi olan kəs, əlbəttə ki, açıq-aydın azğınlığa düşmüşdür". (əl-Əhzab, 36).